اكلة شعبية تشتهر فيها مدينة حائل . ومن افضل طرق طبخ ورق العنب
مقدمة :
الارز المستخدم بالصورة تمن عراقي
وينفع العنبر , و المصري .
اللحم افضل ضلوع الغنم بسبب الشحم اللي فيه
في الصورة تجربة بالدجاج وتجربة باللحم . لكن الدجاج اضطريت اكثر الزيت تقريباً ثلث كوب اسقيته للكبيبا بعد مرور ساعتين على طبخه
الحشوة :
بصل مقطع صغير , ثوم مبشور , طماط مقطع صغير , كزبرة مفرومة , بقدونس مفروم .
نشوح البصل والثوم مع زيت على النار لين يصفر البصل
اضيف علية مكعب ماجي , وملعقة صغيرة كل من :
قرفة , هيل , كركم , فلفل احمر ,كمون , كزبرة ناشفة , ملح .
بعدها اضيف الطماط والرز بعد تصفيتة من ماء النقع
والكزبرة الخضرا والبقدونس . وممكن اضافة دبس الرمان ملعقة صغيرة .
ملاحظة التمن اضيف نصف كوب ماء
للحشوة وهي على النار حتى يلين قليلاً.
طريقة لف الكبيبا :
اولا احضر ورق العنب واسكب علية ماء مغلي حتى تلين الورقه ويسهل لفها والمحافظه على الشكل
اربع مراحل لفها موضحه بصور العرض .
نوعية الورق تأثر على الطبخ . في بعض الورق قاسي وبعضها رقيق .
طريقة الطبخ :
اضع بااسفل القدر طماط وبصل مقطع كبير ورشة خفيفة من الكركم والفلفل الاحمر وكمون ثم الدجاج وابدا بصف الكبيبا على الوجه ( اضفت حلقات بطاطس بالفراغ بين الدجاج * لكن بالطريقة الاصلية مافيه بطاطس .. لكن انصح فيه لان الطعم طلع لذيذ
ملاحظة : اذا كنتي بتقلبينها وتقدمينها بصحن التقديم على طول
تصفين الكبيبا على وجهها
طبعا الكبيبا مفرزنه من ايام توفر ورق العنب بالسوق .
2-
نحضر قدر ثاني ( يسمى مرق الكبيبا او طعم الكبيبا ) بصل مقطع صغير , وثوم , وزنجبيل طازج مبشور , وطماط مقطع صغير
يشوح البصل حتى يصفر ويضاف له الثووم والزنجبيل والطماط .. ويضاف له مكعب ماجي وبهارات وملح
واتركه يطبخ بماء كافي حتى يتركز لونة .. قطعت جنحان صدور الدجاج وحطيته معه عشان يتركز الطعم .. ومكعب ماجي .
احضر قدر الكبيبا
واضع صحن وفوقة بسلطانية صغيرة ممتلئة بالماء .. واتركة قليلا على النار قبل اضافة مرق الكبيا
ثم اسقية بمرق الكبيبا .. بالبداية تكون النار متوسطة عالية قليلا
بعدها توطى النار .. مع مراقبة كمية المرق فيها واسقاها مرق الكبيبا بعد كل فترة وفترة .
فائدة الصحن يثقل حبات الكبيبا في بداية الطبخ حتى لاتتسرب الحشوة
بعدها بساعتين ابعد الصحن .. واسقيها زيت الزيتون اسقيها عصير ليمونة وحده فقط بعد مرور ثلاث ساعات .. واتركها نصف ساعه تطبخ مع الليمون ثم اطفي النار .
تطبخ الكبيبا ثلاث ساعات ونص وممكن اربع ساعات حسب ليونة ورق العنب .
كبيبا
